يرثي زوجته نوره الحامد رحمها الله ؟؟
 

هذه قصيدة الاخ سليمان عبدالله محمد الصريخ يرثي زوجته رحمها الله

الفن الا يالله يامحصي الناس يامغنـي المحتـاج مـن بعـد الافـلاس
الباء بكت عيني افراق الحبايب والقلـب شبـت بـه وقيـد اللهايـب
امس العصر بعد الصلاة شيعوها للمقبـره فـي ساعتـن وادفنوهـا
وجدي عليها وجد من ضاع مالـه واصبـح فقيـر وحالتـه يرثالـه
البارحه قاعد واخيل النجومي ابكي علي الغالـي حسيـن الرسومـي
ماحيدة عن طاعة الله انيـه ذكـره علـي السانـه صبـاح وعشيـه
يالله ياللـي برحمتـك نستعينـا تغفـر لنـور العيـن والمسلميـنـا
احبها حبن دخل في عظامـي والقلـب هايـم بـه شديـد الهيامـي
التا توفي صاحبي يوم الاثنين شهر اثنعش من عام ستـه وعشريـن
الله يرحمهـا عـدد مايقولـون الله واكبـر بالمسـاجـد يصـلـون
الي تذكرت الليالي والايام اللـي مـع الغالـي مضـت مثـل الاحـلام
لو الشفاء يشرى شريناه بالمال ارهن حياتـي بكـل دكـان واحتـال
الثاء ثلاثين السنه كنها يـوم كنـت اطلـب الله يجعلـه دايـم الـدوم
من بعدها الدنيا اسودت سماها والعود الاخضر جف مـن قـل ماهـا
الجيم جزاء الله صاحبي خير عني واللي كتب رزقـي منيـب امتهنـي
الحاء حياتي ماتسـاوي دجاجـه عنـدي ولا عصفـور والا خماجـه
كنـت اتمنـى والمنـى ماحصلـي تحضـر زواج ابنيتـه تسفهلـي
الله اخذ امه وعوض بخـالات عنـي وعنهـا فرجـن كـل كربـات
ادعي لهن ماشي وقاعـد وقايـم اعـداد ماهبـت هبـوب النسايـم
المؤمنـات القانتـات الصوايـم الله يجمعهـن علـي الخيـر دايــم
الله لهن يصلح خواتيم الاعمال واعيالهن وارجالهـن بكـل الاحـوال
بنصحك يابنتي نصيحت شفيقي من اسمعيهـا قبـل مايجـف ريقـي
الله معك خليه دايـم رفيقـي ذكـره معـك خليـه بالزيـن والشيـن
مع صاحبي راحت مراسيم الافراح خلاني في بحرن من الحزن سبـاح
يارب تجعل قبر نوره رياضي روضه من ريـاض الجنـان العراضـي
الخاء خسارة مال ماهي خساره لوهي مـلا مكـه الـى حـد قـاره
والله ماكني مـع النـاس حيـا مـن يـوم فارقنـي جميـل المحيـا
انا اشهد ان العبد ماله تصاريف مهما بكاء فـي عاليـت المشاريـف
يالله عساها ماتجيهـا اللهايـب وانـا واهلهـا ومالنـا مـن قرايـب
الدال دوك العين والقلب دامي ياويـل حالـي مـن يـداوي سقامـي
الـذال ذكـره مايفـارق لسانـي الصاحـب اللـي بالمحبـه رمانـي
ياخوي انا ضاقت بي الـدار ياحمـد كذلـك الدنيـا وهمـن سبانـي
برقن لمع من يم ديـرة جـدودي ذكرنـي الغالـي رهيـن اللحـودي
الراء رحيل الزين والله كايد خلـف بـي الوسـواس وكـل النكايـب
كلن معه غالي وانا اليوم وحدي والله مـدري ويـش ابـدي واعـدي
الزاء زهمـت وجاوبتنـي حمامـه تطـوح الونـات فـوق العدامـه
السين سعيد الحظ من لـه حبيبـه ويشوفهـا دايـم وعنـده قريبـه
الشين شبت في ضميري حرايق والحال يسرقها مـن البيـن سـارق
يـارب اسالـك لاتخيـب رجايـه اقبـل دعـاي بالصبـاح ومسايـه
يارب تغفرله عدد مايصلون واللـي يصومـون ارمضـان ويزكـون
الصاد صرت ابحالتن يرثيله مالـي احـد مـن هالبشـر اشتكـي لـه
الضاد ضامتني ظـروف الليالـي راحـت وخلتنـي وحيـدن الحالـي
الطاء طويت الياس من شوف نوار يالله عسي ماتمسها لفحـت النـار
العيـن عاملنـي بلطـف ومحبـه وانـا بعـد ماجـاه منـي مسبـه
الغين غابت شمعتي والامانـي ماطولـت غابـت معـه فـي ثوانـي
لكم الاجر ياللي سمعتو كلامي ادعو لهـا الرحمـن بطيـب المقامـي
الفاء فريده بحسنها وحسن الاخلاق ماهي من اللي بكل يومن بالاسواق
اجواد من اجواد من سالف ايام مثل الذهـب ماغيـره طـول الايـام
القاف قلبـي مـن ونينـه تمـزع والكبـد كنـه بالخناجـر اتقطـع
الكاف اكتابن وانكتب في جبينـي انـي افـارق نـور عينـي ظنينـي
اللام ليته في منامي تجينـي دايـم واهيـض ماخفـى فـي كنينـي
من ضيقتن بالصدر كني بزجاجه وين اللذي لاجيت يضحـك حجاجـه
في يوم وحنا للضبـط مقبلينـي اقـول لـه لامـت انـا فاذكرينـي
اقري علي وكثـري القـراءه زودي علـي الثنتيـن صـورة بـراءه
وانقلبـت الايـام وصـارت بدالـي امرمقـدر يابعـد كـل غـالـي
من وين ماوجهت وجهـي تـزول قـدام عينـي ماتغيـر عـن اول
الميم مـدري لكـن امـرن دهانـا تحيـرت فيـه العقـول التكانـه
شين يهد الحيل والعقل يحتار والقلب من هول المصيبـه علـي نـار
مرت علي ايام اسود نهـاره مـن وقـع الدكتـور واصـدر قـراره
النـون ناظرنـي بعينـن حزينـه وده تقـول شيـن ولا استبيـنـه
ابكل صعوبـه فهمتنـي مـراده وادمـوع عينـه غرقـن الوسـاده
قلت ابشري هذا علي عهد واوفيه مادمت انـا حيـا وربـي اناجيـه
الهاء هواتي ماتغيـر نباهـا مـن يـوم اخذتـه ليـن ربـي خذاهـا
الواو والله مانسيته ولا يوم واللي يقـول انـي نسيتيـه يجـي يـوم
الفيتن ارثي بها نور الاعيـان ولفتهـا واللـي بقـي لـب الاحـزان
هذي ام عبدالله ماهيب اي انسان ماكلفتنـي مامشـت لـي بحقـران
الله من شين بصدري كتمتـه اكبـر مـن اللـي بالقصيـده ذكرتـه
الياء يقول ابن الصريخ بالختامي مني علـي الغالـي كثيـر السلامـي

رحمها الله واسكنها فسيح جناته والمسلمين آجمعين

الله يرحمها ويرحم اموات المسلمين

رد
 

الله يغفر لأم عبد الله ويسكنها الجنه وجميع موتى المسلمين

رحمها الله
وأسكنها فسيح جناته

ما أروع الوفاء عندما يكون بين الزوجين